樂園魚蛋粉

營業中

休息中

好耐冇食過魚蛋粉嗰d, 今日見自己一個人食就決定食依間。餐牌好精美圖文並茂，應該係因為方便遊客睇啦。今日想食得豪氣d點咗個雙拼嘅牛雜牛筋麵, 都冇令我失望。葱用咗隻匙羹另外放，一見到碗麵都已經覺得佢好足料啊。牛雜同埋牛筋嘅份量超多，一個女仔食有少少食唔晒嘅感覺。最好食嘅我覺得係牛肚，因為整得好軟同入味，其他牛雜都正正常常，比街邊檔嘅牛雜好食。幼麵煮得啱啱好，冇鹼水味。另外見到佢有個數量限定嘅酥炸門鱔皮都好似幾特別，唔知係咪同平時食開嘅魚皮唔同呢所以就叫嚟試吓。佢係一包咁樣上，仲有埋碗湯一齊。不過個人覺得點牛腩湯汁會好食啲所以就冇點佢提供嘅湯啦。魚皮浸咗落牛腩湯度好入味，可能因為佢係門鱔皮嘅緣故， 佢比一般嘅魚皮硬身，所以即使浸咗一段時間都唔會太冧， 仲保持到卜卜脆嘅感覺。最後叫咗杯香奶奶茶作結，好滿足呀。