Ocio (積存街) (已結業)

大圍真係好多餐廳，今次揀左Ocio呢間西式小店店既面積唔算好大，座位唔算多，但內在裝修好有心思，有唔同既海報同粉筆畫同各種裝飾。食物方面，我地叫左一份芝士蘑菇釀春雞。半隻春雞釀滿芝士汁同新鮮蘑菇片，唔係一般既烤雞旁邊比碗汁你，所以雞肉保持到好juicy，好嫩滑，而另一邊冇汁既雞皮都燒到好脆。伴碟有小小茄汁豆，炸薯條同黑醋沙律，份量十足好飽肚！另外叫左假日午餐 - 黑松露帶子意大利飯，雖然帶子唔係大粒個種，而係珍珠帶子，但黑松露汁真係做得好濃，意大利飯都軟硬適中。飲品方面，加錢要左一杯熱既榛子咖啡，上面充滿奶泡，咖啡味香濃，配上淡淡榛子味，不錯不錯。另外都叫左一杯香蕉朱古力奶昔，一入口香蕉味好濃，之後慢慢滲出朱古力味，奶昔黎講唔算好稠，但都好飽肚。總括黎講，食物質素中上，價錢合理，經過大圍都可以黎試下。