麻布茶房 (已結業)

係君怡見完美國客,行過對面街見到麻布茶房,突然想食軟雪糕,順便係度開埋餐。通常只有星期六至會行尖咀,呢度通常人頭湧湧,今日二點過後,人都無多個,如此寧靜環境合晒我要求啦。午餐飲品又唔包括有軟雪糕款式,改為散叫。霜淇淋咖啡:好大杯!!見到堆軟雪糕已經好開心,睇落好似好少,其實咖啡下仲有一大團;味道好香滑,好重牛奶味,yummy!! 齋飲下咖啡,係唔甜既,甜味係全靠團雪糕,咖啡味都幾香濃,真係齋飲都ok。茶房風燒雞飯連配菜: 配菜有一小碗蓮藕、魔芋片同一碗酸青瓜、紅蘿蔔、豆芽。前者唔覺有什麼味道,後者又唔酸,不過有d蓮藕、青瓜爽爽地,食起飯黎無咁漏。木魚湯好清,入面有幾條蛋絲,清清地咁啦。燒雞肉好熱,味道甜甜地,正係我鐘意既照燒汁味道,只可惜好少汁,如果多d汁就更好。飯面黃色既好似無殼綠豆,但唔肯定,溝埋d薑絲、紫菜絲,原來又幾好味架喎。可能今日人少關係,服務都好好,不過呢間分店都係時候換下座椅,因為見到好幾張卡位都爛左,作為尖沙嘴遊客區既食店,出現呢種情況唔係太好lu。