千房 (已結業)

話說見到DIY大阪燒，本身好興奮諗住去玩下試下自己整，唔估到一入黎就受悔氣，入座無5分鐘個經理已經催咗幾次落單未，心諗黎食餐飯姐洗唔洗催命咁？之後無奈下落咗個diy大阪燒先，再繼續睇下menu，個經理喺落單果陣已經用好不屑嘅語氣話一個大阪燒三個人唔夠食，我地都解釋咗係落住先，仲睇緊個menu，畢竟係第一次黎，都唔知咩好食，之後個經理仲一直強調三個人要叫三樣嘢，唔係佢開個爐俾我地diy會蝕。我地會落，但唔係一坐低即刻就落單好無？全個場咁大得兩檯客又唔係忙？又唔見有客喺出邊等緊位？洗乜咁樣催？個經理仲威脅我地如果無叫三樣嘢就格硬幫我地order幾杯嘢飲，落完個diy大阪燒之後仲聽到個經理好大聲咁嘲笑我地話三個女仔叫得一個大阪燒，真係第一次見咁無理嘅人都做到經理，真心為呢間舖嘅營業深感擔憂呵呵，最後我地都係無心情食呢餐飯，叫多咗個lunch set就算。呢間餐廳應該算係全香港最差服務態度嘅餐廳？第一次食嘢食到成肚氣，從來唔寫食評嘅我第一次寫食評，真係令我印象深刻嘅餐廳，永遠嘅blacklist，不會再幫襯。（其他侍應服務態度好好，係個女人經理連做人嘅基本質素都無）