塔門仔海膽燒 (已搬遷) 新店位置

陪朋友聽心靈講座聽到九點幾，心靈滿足哂但個肚仔就空空如也。但太夜又唔想食澱粉質，串燒就係一個好選擇。街角見到好大個易拉架，原來有間串燒店主打塔門海膽。塔門牛就多姐，原來果度都盛產海膽的。老闆原來真係塔門人，牆上面可以見到唔少塔門人家的生活照。食物除左主打的海膽，都仲有唔少選擇。雖然一場黎到，但我地一味海膽都無點到。因為朋友仔係唔食海膽的，真可惜。先點一客涼食，螺肉的份量好多，涼涼地又爽口。燒茄子原條切件上檯，燒到好軟但又不至散開。蒜片做到吊味的效果，配合少少香料，效果幾好。燒牛舌厚切，咬開好juicy，牛味亦算濃厚。煙肉露荀卷係最得我地歡心的一客菜式。煙肉薄薄的，表面燒香，油份都被迫出，香口但無油膩感。露荀用上最嫩的部分，完全無渣，又帶點清新。兩種食材混合，再配上恰到好處的火候，確係一絕。煙肉扒大傘菇其實都整得好好食，但相對驚喜無甘大。因為呢個菜式係必定的好食，較難有驚喜的空間。當然，能夠做出水準亦值得一讚。簡單的宵夜，令到我地的肉體繼心靈滿足後得到滿足。而埋單兩人只係$150，實在好划算！