臺灣姑娘 (已結業)

Item: 臺灣姑娘
Rating: 5
Author: mildseven777

LADY TW

5 食評

味道

環境

服務

衛生

抵食

102

荃灣

$50以下

台灣菜台式飲品

mildseven777

等級2

昨天中午到荃灣西開會 ,見到街上面嘅廣告寫住台灣火車便當。因為之前成日去台灣嘅關係，成日都會響街好似當地嘅上班族一樣，會買當地嘅便當。如果坐台鐵嘅話更加一定會買台鐵嘅火車便當，因為火車便當係做得好精緻而唔係普通一個飯盒，無論盒入面嘅擺款同埋味道都非常特別 , 因為佢係整定嘅便當,唔會太過熱辣辣 ,但係喺溫暖嘅狀態下都保持到美味, 呢個係火車便當嘅特別之處。但依家疫情關係已經好耐冇出國，所以見到火車便當四個字即時眼前一亮。不過喺香港有啲自稱台灣便當嘅地方，之前都試過好多次，根本就唔係嗰樣嘢，完全冇台灣特色同嗰種味道。但係因為太耐冇食台灣嘢嘅關係，見到呢個街招都跟住摸上去。
原來呢間舖頭響工業大廈裏面，冇做堂食只做外賣，佢有四款飯分別係，雞腿爌肉，鹽水雞，排骨同埋紅燒牛肉，仲有台式飲品供應。我叫咗一個鹽水雞便當同埋珍珠奶茶 ,然後拎咗返去 office 。當喺個袋拎出嚟時，竟然有驚喜，因為個盒唔係普通嘅外賣飯盒，佢係用返台灣台鐵嗰種火車便當盒，當堂一種熟悉嘅感覺返咗嚟，感覺好似去咗搭台鐵咁。跟住打開飯盒，更加喜出望外，佢成個擺盤就同台灣食嘅一模一樣。台灣嘅火車便當一定有幾樣元素，會有配菜漬物，時令蔬菜，肉類，同埋會擺得好整齊填到個盒滿曬，畀你一種好飽滿嘅感覺。我呢一盒係鹽水雞便當, 裏面有整整一隻雞髀 ,仲有玉米筍同埋薯仔。雞髀好緊緻有啲似走地雞嘅感覺 ,充滿鹹香味。我食得出薯仔係用橄欖油撈過，每樣食物都有特別處理過 ,好有心機。最緊要嘅係佢仲要獨立配一盒醬料喺裏面,呢盒醬料竟然係香菇肉燥。重有係啲飯，粒粒分明又香口，真係好有台灣味，喺香港從未見過。
今日繼續開會，我當然又去再幫襯佢，今次試一個叫做漳化雞腿爌肉便當。同昨日一樣，一打開，擺得好精緻，成個便當擺得滿滿咁樣。三種漬物分別有紅蘿蔔白蘿蔔同埋青瓜，酸甜適中。蔬菜有高麗菜同埋四季豆。主食有半隻鹵水蛋，竟然有啲糖心。一隻鹵水雞下髀，同埋爌肉。五花肉煮得油香滿口，入口即化。今次呢個便當嗰盒醬汁係蔥辣醬，呢個蔥辣醬不得了，根本就係漳化食爌肉嗰間舖頭獨有嘅蔥辣醬，竟然畀佢做咗出嚟。呢個醬落埋落啲飯度，根本就唔夠送飯，最後一粒飯都冇剩。後尾我問返啲同事，原來呢間舖頭係新開嘅，淨係開星期一至五做午市，搞到我想星期六日過嚟買都唔得。希望呢間舖頭可以開到分店響出面，咁就有機會多啲食。真心推介，想食正港台灣味一定要嚟試。