千里屋食堂 (已結業)

銅鑼灣日式餐廳越來越多，從時代廣場街番過去世貿中心既時候見到呢間新開既千里屋，仲要日本人員工熱情為我地介紹餐牌，咁就試下啦！《壽喜燒御膳 $189》壽喜燒除咗有一鍋菜之外，另外仲有白飯、味噌湯、醃牛肉、雞蛋卷！重點當然係一碟我一個人都食唔晒嘅牛肉！壽喜燒湯底甜美而夠濃，好啱重口味既朋友！只要將牛輕輕煮十幾秒，牛肉已經吸收到湯底既甜味，之後放入攪拌過既生雞蛋過過冷河，咁就食得！正！我一個人都食唔曬，確實抵食。配菜中既煮牛肉味道唔錯，色澤已經反映左係重口味的～不過我鐘意！ 《和牛鐵板三種 $298》朋友就選擇左較貴嘅和牛鐵板餐，果然係一分錢一分貨！和牛入口即溶，油脂豐盈，三種和牛嘅口感同油脂分布有少少唔同，另外仲有醬油、芥末、及鹽調味，其實牛嘅質素咁好，即使唔點任何調味都已經好好食！食飯嘅時候，都見到有日本遊客特登嚟呢度，而餐廳內亦有日本侍應，令你感覺身處日本中。