壽喜燒 友 (已結業)

午市都會有omakase，仲要係壽喜燒既omakase，有8品料理，價錢又唔貴，$580一位抵呀！🌼前菜沖繩水雲、松葉蟹凍蛋、鴨肉松風、蜜柑寒天，每款都特別，每款都好食，水雲好爽彈，口感好得意，蟹凍加上蒸好既滑蛋又係另一鮮香既配搭，鴨肉整成一粒糕點形狀，煙韌有嚼勁既口感，蜜柑都係一粒糕，凍凍地同樣好食！前菜既份量唔會太多，不過份量少就顯得更加精緻好食！茶碗蒸🪻茶碗蒸一杯份量，蒸蛋完全無倒汗水，好滑溜，蛋香好濃，配料都係普通既冬菇，唔會好咸好濃味，食到既反而係淡淡既鮮香清香，整得好好！🌻日本野菜日本野菜一碟有雜菜同冬菇，全部都用壽喜燒汁慢煮過再上碟，每一條菜都吸收晒燒汁既香味，而且炆煮得好淋，又夠晒入味，絕對唔單調呀！壽喜燒🌺呢個絕對係呢個餐既重點，用上A4和牛做主料，一次過食到3款不同口感， 肉眼，西冷，肩肉，各有特色，好中意肩肉，肉質特別鮮嫩多汁，細滑味美，無論係配燒汁同菜食，定係簡單咁點生雞蛋去食，味道都係咁難忘！