翡翠拉麵小籠包

營業中

休息中

今日游水日，一落堂三隻馬騮已經講要食嘢！本來想食壽司（永遠唔厭嘅壽司）可惜好多人排隊，轉陣去食旁邊上海菜！唔使等位，即入靠牆六人枱！地方闊落！餐具乾淨企理！好簡單叫五個菜！食物好快就上！嫩雞煨麵：麵完全夾唔起，淥過晒火位，淋到只可以用湯匙食！小棠菜及雞肉碎無味！湯又無味！好像淥完放好耐，索晒湯先比我食咁！差！ 乾煸四季豆：乾身入味，唔會好油，配咸肉碎好味！清晒！上海小籠包：一籠四隻，一夾起就穿窿漏晒啲湯，差！一間以小籠包為名嘅餐廳，唔合格！個皮有煙韌感覺，湯汁又多，肉又唔嚡！味道其實唔錯，可惜穿皮！鯊魚骨湯珍菌拉麵：麵餅要剪斷有何原因？麵粗身有咬口，雜菌新鮮煙韌，但個湯唔夠味道，連魚味都無！只是白色水，淨飲都唔夠味！差！紅油抄手：雲吞皮薄餡多，不過好像淥過火，皮一夾起就爛，紅油汁唔算好辣但好嗆喉！會攻到咳！味道一般！食物真係一般，店員服務勤快，其中一個女店員可能見我三隻馬騮，都好好笑容傾下偈！餐廳其實好坐，如果食物正常真係唔介意再來！