順濠坊 (已結業)

返工日子最爽就係放工去食好西嘅時刻，想爽爽佢所以就約左媽咪去食一間小菜，佢就慳返啲力水可以唔洗煮啦！間唔中都要咁樣調劑享受下人地煮埋嚟就食嘅感覺㗎嘛！呢間順濠坊可以打邊爐又可以食小菜，兩樣都想就兩樣都嚟啲啦，我想食酸菜魚又想食九肚魚！兩樣嗌晒就夠滿足啦！酸菜魚勁大煲，啲魚嫩滑魚湯奶白色好清甜有家嘅感覺！兩個人食真係覺得啲魚食極都食唔完咁仲有唔同嘅菇作配料，好豐富！仲點左椒鹽九肚魚，外面勁酥脆內裡好軟滑！連埋蒜片一齊食仲香口！仲有好驚艷係佢地嘅醉豬手，本身仲驚係凍上嘅，但原來係熱騰騰藥膳豬手再帶點酒香啫！豬手舊舊都好大舊，最正係豬皮充滿膠質嘅部分，筋位都好爽口！最後再食埋炒萵筍就剛剛好啦，唔油仲keep到爽脆嘅萵筍就知呢度炒野好掂！