千鍋居 (已結業)

哈哈3年無出食評，太懶了!!專登上返黎因為朋友請大家食左餐好味東東，要表揚一番!! 餐廳開業短短1個月，已經聽聞過此店水準唔錯，仲上埋雜誌添，所以朋友一話請我地黎千鍋居，就滿心期待了啊。餐廳裝修簡潔企理，每枱均設一個電磁爐，仲有卡位可以自成一閣，坐得幾舒服的。大良蟹雞鍋 $278不愧係招牌菜，一上枱就香噴噴而且雞肉嫩滑，雖然蟹唔大隻, 但蟹鉗相當鮮甜入味! 最後加入烏冬，索晒D湯汁超好味啊，一個烏冬實在唔夠喉!!花蛤蒸水蛋 $88自細鐘意食蒸水蛋，但係加入花蛤既水蛋真係第一次食啊! 花蛤鮮甜味完全滲入嫩滑水蛋，簡單美味，係全晚最受大家歡迎既菜式!!醬油碌鵝砵 $148另一招牌菜亦頗受大家歡迎，碌滿秘製醬油既鵝肉非常肥美而且軟腍惹味。椒鹽蝦 $128蝦肉新鮮爽彈配上蒜香椒鹽當然十分美味! 食剩2隻時驚覺碟上既椰樹圖案原來係師傅用醬油畫的!!! 好有心思啊!清湯崩砂腩煲 $148湯極清甜，牛腩非常軟腍且帶脂香，蘿蔔又入味，大家都好驚喜。九制豬手 $88向來唔太鐘意食中式豬手，俾面淺嚐一口haha。豬手炆得軟滑，店員聲稱甜味全來自話梅，絕不額外加糖。個人認為醬汁偏甜，如果酸D可以更開胃美味。