陸陸雞煲火鍋 (已結業)

睇完show已經夜晚十點幾，一大班同事打算宵晚加吹水，於是去到陸陸。香港人一年四季打邊爐，已經見慣不怪，但夏天三十幾度焗住食麻辣雞煲，就真係搲爆頭都唔明。係為咗大魚大肉，抑或邊食邊傾，實在不得而知。Anyway，我亦唔明點解來自大陸北方嘅雞煲會傳入香港，因為呢種食法以至格局，其實唔係太適合南方氣候，一來濕二來熱三來味道濃烈，食完汗疊汗仲食苦過做苦力。但同事們強推，於是放開心情一試。個人感覺係，雞煲本身料足，雞肉入味，煲汁即使係走辣亦惹味；就算再用熱水沖稀加料打邊爐，配料亦好入味。同時間叫咗個小辣煲，點點刺激過癮非常。我唔係食開辣亦食得開心。但講真，自己胃口偏細，加上煲汁太油膩，即使以齋菜為主，食完都好滯下。或者，呢啲係滋味嘅代價。即使係8至10人，如果人人胃女細，其實淨食個煲都好夠下。當然，最好叫多些少菜，咁食落健康好多。因為煲入面，想搵條菜都難。唯一要投訴嘅，係枱上嘅電磁爐經常自動熄爐罷工，開開關關好麻煩。