Tommy Yummy (翡翠中心)

營業中

休息中

係中環上半山自動扶手電梯成日經過一間裝修得幾靚嘅泰式Cafe，好Chill咁望住條街，有嘢食又有咖啡飲，今日終於過到嚟食個Late lunch。虎蝦海鮮混亂杯麵🌶️我唔係倒瀉咗個杯麵，係本身賣相係咁樣，其實佢係一個冬陰功海鮮炒杯麵。都幾多海鮮，有虎蝦、青口、魷魚，酸酸辣辣。最抵死係個杯麵杯其實係間餐廳自己個名，成份同營養標籤寫得幾搞笑，想知道自己去食啦。任你泰串🍢自己揀三串嘅串燒，揀咗糯米豬肉腸、豬頸肉、雞肉串。有兩款汁：酸辣汁或者沙嗲汁，我自己都係鍾意沙嗲汁甜甜地。串燒比我想像中好食。椰子飄香咖啡🧋去Cafe梗係要飲咖啡。天時暑熱揀咗個凍嘅椰子味咖啡。上面有個椰子雪糕，勁濃椰味。加咗$5轉咗Berry Blend咖啡豆由三款豆混合而成，有啲hazel nut味。TY芒果糯米飯🥭呢度咁好坐就叫埋甜品慢慢食，最愛芒果糯米飯，砌到成朶花咁好靚，上面仲有椰子雪糕，再加入椰漿，啱晒食完辣野嘅我。