小果籽

營業中

休息中

曾幾何時，紅磡崇潔街係香港好出名嘅食街，其中加太賀更加係名店中嘅名店，無人不識。今時今日，崇潔街依然食肆林立，但係已經好少聽到人話專登去搵嘢食。小果籽喺呢度有兩間舖，主打沙律，三文治，水果等食物，同時亦有飯同意粉等主食供應。我好鍾意食水果，以前屋企附近曾經有間花果園餐廳提供類近 menu，可惜結咗業，食生果同沙律嘅黃店真係愈來愈少，好彩仲有間小果籽。下午茶時間，叫咗邪惡拉絲芝士火腿西多士配自選沙律，西多士上枱時熱辣辣，外層略脆，唔太油膩，入面嘅芝士同火腿鹹鹹香香，好正👍。店家提供用嚟點西多士嘅唔係糖漿而係蜂蜜，一嚟冇咁甜，二嚟比較健康，而且仲充滿蜂蜜獨有嘅香氣，一鹹一甜，味道出奇咁夾。自選沙律我揀咗小果籽園，其實即係時令水果，今次提供嘅係西瓜，紅肉火龍果同哈蜜瓜，可能因為係下午茶，份量比想像中少。三者中以西瓜最好食，又甜又多汁🤤；哈密瓜都甜，但係就有少少硬；紅肉火龍果則較淡口，而且可能放得耐咗，肉質過腍。