江南瀨粉 (福榮街) (已結業)

印象中以瀨粉做招牌既店鋪唔多，而呢間餐廳係少見用瀨粉做主打，咁就當然要入去試一試佢啦～佢主要係似嗌餸配瀨粉，亦都有配搭好既套餐比你揀，價錢就差唔多。而鋪頭牆上亦有佢十大推介既餸。有興趣既朋友可以揀嚟試下。而今次我就係自己揀餸，揀左鵝腸，鳳城水餃同陳皮魚蛋，配合瀨粉同酸辣湯，最後加埋杯凍檸茶（$9）。三餸瀨粉（$55）份量都夠多，賣相唔錯。首先個酸辣湯底辣度無得揀，但對我嚟講已夠夠辣，可能嗜辣既朋友就未必夠辣啦，但個人覺得酸度不足，辣既味道蓋過左酸既味道，呢樣係有啲不足既。但係佢既瀨粉的確唔錯，食落瀨粉夠煙韌，口感介乎米線與薯粉之間，無薯粉咁難咬又無米線咁淋，係外面真係未食過呢種既瀨粉，佢手工做既的確值得一讚👍🏻至於鵝腸清理得夠乾淨，處理得唔錯，而佢灼得岩岩好，唔會太韌，食落好爽口，作為店鋪推介的確唔錯👍🏻而水餃亦似係自己包既，足料同餡料算新鮮，唔似係雪藏得好勁既水餃，食落有驚喜👍🏻而陳皮魚蛋就正正常常。總結呢間店舖既野食好多都係自家製，感受到佢地店舖對食物質素既堅持，畢竟外面買製成品係方便同平好多的。雖然佢既價錢稍稍比同區既貴小小，但質素方面實在對得起呢個價錢👍🏻值得去試吓👍🏻👍🏻👍🏻