人和月雞煲火鍋店 (已結業)

唔講唔覺小妹已經有大半年無食過雞煲, 可惜而家禁左堂食晚市! 不過, 最近上網見到有人食外賣雞煲仲要唔洗任何煮食用具, 兩手fingfing食飽都唔洗洗碗, 於是小妹就去買嚟試下! 餐廳除左有雞煲, 仲有全日套餐可以選擇, 價錢亦唔貴! 小妹點左個招牌麻辣雞煲BB辣, 套餐仲可以揀兩款肉, 兩款丸同餃, 兩款豆品／冷凍食材, 兩款蔬菜／菇同兩款自家製飲品同一款精選粉麵, 成個set咁多野食又咁方便都係498, 確實幾抵食! 食完雞煲仲有湯可以打邊爐, 正! 雞煲味道幾夠幾惹味, 唔夠重口味仲有多碗汁可以加落去, 只要將個雞煲擺落去個架上面, 開著個火就食得!小妹揀左牛板腱, 日本黑豚肉片, 木耳餃, 芋泥包心丸, 芋絲, 牛柏菜, 金菇菜, 蒿荀同烏冬, 而飲品就揀左一枝蜂蜜菊花露同一枝桂花烏龍茶!每樣都清洗得好乾淨, 份量幾足, 特別推介木耳餃同芋泥包心丸, 木耳餃咬落去口感爽脆好juicy, 芋泥包心丸芋泥好足, 味道仲好濃幾好味!