圓山台灣料理 (已結業)

M佬轉咗工前，Weekend飛轉台灣都無問題，依家M佬每個Weekend都瞓到日上三竿。既然無得飛台灣，就去搵間台灣餐廳食下，聽講尖沙咀圓山台灣料理好正宗，就去試下佢嘅二人晚市套餐A。涼伴耳絲薄薄嘅豬耳絲預先撈咗麻油，惹味兼爽口，口感豐富，唔錯嘅開胃前菜。足料老火湯每日唔同款，呢個老黃瓜扁豆煲豬肉，非常足料，無落味精，入口鮮甜。鹽酥雞食台灣菜點可以無鹽酥雞，新鮮炸起，外皮香脆，內裏雞肉嫰滑，不過如果多啲鹽同胡椒，會更香口。屏東小炒呢個絕對係小炒皇啲friend，有韮菜、芹菜、蝦米、魷魚、臘腸，腩肉同芫茜，好惹味。蒜蓉炒A菜A姐食A菜，另一台灣菜嘅代表，淡淡嘅蒜蓉味吊出A菜嘅鮮甜。台南擔仔麵 或 台式滷肉飯我哋一人揀一款，愈普通嘅菜式愈考功夫。擔仔麵湯底濃郁，麵粉掛湯力強，正。滷肉半肥瘦，入口即溶，撈埋飯，真係Perfect！（記住Like同Share畀朋友）