天鳥居酒屋

營業中

休息中

今日朋友遠道而來，所以就帶左佢去附近食岩岩開左一排既日本野。雖然呢間鋪開左一段日子，但我都係第一次去食。鋪頭既坐位寬敞，枱都夠大，一啲都唔會有擠迫既感覺。食物種類選擇繁多，由鍋物，串燒，到壽司，魚生，都應有盡有。我本來身想食牛肉鍋，但朋友麻麻地，所以最後叫左啲壽司同刺身share。串燒方面，燒秋葵幾出色，燒得剛剛好，唔會太乾，入面仲有水份，木魚絲加落去幾好食。串燒牛心未食過，所以就叫左黎試。口感都唔錯，唔太似食緊內臟，幾彈牙。鹽燒厚切牛脷心正！厚切既牛脷好有咬口，而且佢係用最好食既舌心部份，雖然調味稍為咸左少少，但係都好好食。串燒雞軟骨正常發揮，咸咸地，脆脆地，都幾好食。壽司方面，用料都尚算新鮮，唔會食到任何一款有腥味，不過我地都覺得當日既壽司飯濕左少少。另外我地叫左一個店員推薦既池魚拼盤，包括左5件刺身，4件手握壽司同兩件反卷。深海池魚刺身幾滑身，肉質都算彈牙，點一點醬汁食都幾開胃，不過壽司同刺身既魚肉都唔算好濃味。另外既反卷幾得意，外面有啲脆脆既蕎麥粒。