章魚燒大師 (已搬遷) 新店位置

呢間章魚小丸子應該好多屯門人都會知，因為可以係個咗偏僻既位都有咁多人排隊食，真係好癲，但之前見到佢地話要執我超唔開心，咁難得屯門有間咁高質既小丸子…點知有日行過見到佢竟然開返，即刻同朋友買左盒黎食，而且我地都有問老闆點解話執但又開返，佢解釋話係拆左夥，之後會繼續開。聽到會繼續開我就無再追問落去。至於重開之後味道有無改變呢？我覺得分別唔大，但無一開始咁好食。不過無咁好食都唔係重開之後既事，而係變大粒之後。因為第一次食嗰時粒小丸子係外脆內軟，無論味道定口感都一流，而且配料方面落得超大方，性價比好高！我覺得重好食過去大阪食，因為正宗大阪嗰種係成粒都比較淋，無外脆內軟既效果，老闆可能為左就香港人口味所以改左呢樣野，我覺得好正！但唔記得幾時開始有得變大革命，每粒小丸子大粒左，但價錢亦貴左。貴左都唔緊要，重要既係大粒左之後個皮無之前咁脆，雖然係似左正宗大阪嗰種，但我覺得以前細粒重高質。而依家重開之後其實係同變大粒之後差唔多味，所以係無變差架，只不過我私心希望整返細粒啲脆啲，咁就完美啦。