其味煮意 (已結業)

位於工廠大廈內的餐廳，如果唔係朋友介紹，真係唔會識搵到。如果無睇到旁邊的餐牌，門口好有工作室的感覺🤣入面比想像中闊落，有埋大電視，環境都幾休閑舒服。⭐️我叫左黑椒薄西冷牛排特餐，有湯有飲品都係$52 (凍飲+$2)，超級抵食。白餐湯味道比較淡，濃稠質地，有少少黏口。我最滿意個牛排，話係薄牛排，但都有兩塊，份量唔少。調味幾香，肉質口感唔錯，唔會’鞋身’。薯角脆脆地，可以接受。配菜無鹽無油，走健康路線。黑椒汁味道可以，不過質地係偏稠(睇相)⭐️黑白粒粒西多士 $29 (連熱飲)味道正常，睇落無完整一塊西多士邪惡，但應該都係錯覺🤣整體食物質素不過不失，勝在價錢夠親民，環境都坐得舒服，有大電視添，坐好耐都唔會趕人走。