Food Combo (已結業)

今日嚟咗屯門嘅V city行街，行完梗係要搵啲好嘢食啦。新開無耐呢間餐廳，望落去光線充足，裝修設計簡約舒服～餐廳主打健康嘅西式定食，價錢由100到200不等，每款都有餐湯、沙律、主菜、小食同埋水果。每個set都唔同㗎，好有心思！點完餐之後仲可以去水吧，有三款唔同嘅飲品揀，非常健康又清新，包括有適合養生女士嘅「紅棗桂圓杞子水」，適合熱辣辣天氣飲嘅「薄荷鮮橙水」同埋「鮮檸檬茶」～不論係湯、沙律、同埋水果，都係由廚師親自製作，唔會假手於人，好欣賞佢哋為西餐定食注入健康嘅元素，好適合我哋香港人，亦都睇得出佢哋好有誠意！我哋叫咗一個「香煎挪威三文魚檸檬牛油果汁配特色雞翼」，三文魚外皮香脆，肉身鮮嫩，雞翼都非常入味。另外叫咗個「美國安格斯西冷牛扒荷蘭汁配南瓜薯餅」牛扒肉質嫩滑，呈粉紅色，咬落juicy。我哋八點嚟到，已經出現人龍，大家想食就要早啲到啦。好推薦大家嚟食，小店位於比較貴重嘅V city附近，希望做得着啦！