華星客棧 (已結業)

今日攞咗leave，早有預謀要喺屋企附近食個悠閒嘅早餐，所以嚟咗華星。weekday 朝早，大把位，俾我獨佔咗四人卡位。諗都唔使諗，叫早餐，轉炒蛋，火腿通粉(而家冇得轉叉燒？)，跟熱奶茶。叫咗唔夠兩分鐘，三樣一齊上。先食火腿通，佢嘅湯底有一種甜味，令佢同普通茶餐廳有d唔同，好味少少。火腿冇乜特別，但係通粉做得彈牙，呢個真係少有。炒蛋，冇得輸！超滑得嚟，又唔會生到蛋汁周圍流，又有蛋味。水準極高而穩定，絕對超越澳牛。牛油多士，都係正。厚多士表面金黃脆口，內軟而有包嘅甜味，牛油已經溶晒滲晒入去，真係好難好食過佢。熱奶茶，香滑茶味濃，但唔會有苦澀味，都係非常高水準。加埋呢班有禮貌嘅侍應，同有軟墊嘅座位，都係嗰句：唔使再去澳牛。