健味粥小廚 (已結業)

尋晚專登去食這間誠意小店。兩人點了魚骨腩粥($35)，油炸鬼($8)，香煎什魚($88)，璋魚蒸肉餅($78)。其實食物好食，尤其係碗粥，但可惜太貴了。太貴意思是不值，那油炸鬼，基本上晚上叫亦不會期望脆，但好似食緊一團粉咁，仲有，收$8，只得7舊，每舊手指一節咁長，夾埋唔夠出面半條。問阿姐，一碟係咁多喇，佢仲好似著數咗您咁，”係呀，$8嘛”。嘩，油炸鬼都成蚊幾一舊仔，仲要唔好食，唉。跟住香煎什魚，$88得4條，每條得5吋度，連頭喎，其中兩條似”慈”魚，街市應該買十蚊兜有6條個隻。再講，煎唔脆之餘，出到嚟係凍嘅，所以好韌，好失望，難為呢個仲係個阿姐一坐低就推介。其他冇叫菜式，例如蝦仁炒蛋要$88，普通炒個牛肉又要$78，已經唔想試。其實老闆應該掉轉角色諗下，如果用$88只換到4條魚毛，$8只換到7舊過氣油炸鬼，您下次仲會唔會幫襯?最後，兩個人食咗$210，覺得好唔抵，唔係個錢面值上，係所換嚟嘅嘢唔值。只可講句，有誠意都冇用，知租貴，但又唔識拉上補下，生意又點會好，好似西隧咁囉，唔好生意，就繼續加價，就愈嚟愈少人用。