潮膳 (已結業)

好耐冇食潮州菜，今晚喺灣仔軒尼斯道行街時望到呢間潮州餐廳嘅廚窗掛住啲潮州滷水鵝，所以入去坐低食晚飯，餐廳入面乾淨企理，燈火通明，樓底又夠高，空間感十足，未開始食已經感覺良好。唔駛諗，即刻叫左一碟例牌嘅潮州滷水鵝，鵝片厚薄適中，唔會太咸，裡面有豆腐卜同大豆牙菜，好耐冇食，實在太棒了。仲叫左個鮮淮山豬肚湯，上枱時熱辣辣，份量唔會太多，一個人飲啱啱好。當然唔會忘記好耐無見嘅𧐢仔粥同埋𧐢仔餅，𧐢仔細細粒漲卜卜，入口滑嘟嘟好得意。餐牌見到有冰梅脆香骨，要左一個，原來喺一字骨，好開心，因為我鐘意食充滿鈣質嘅軟骨，呢款菜唔單止每條一字骨都有大大小小嘅軟骨，啲肉仲要喺半肥瘦，加上面頭有一層厚厚嘅透明甜酸醬，所以香脆可口唷。