金泰美食 (已結業)

小弟生日，一行4人諗住去九龍城搵間泰國餐廳試試，最後揀左金泰。當時時間6點幾，所以一入餐廳，一個人都冇，位任坐。首先講下環境，毫無美感可言，有d似飯堂。我地坐近牆邊，會有小量昆蟲，不過我地4個麻甩佬，都唔太介意呢d野，最緊要好食！跟住講服務，泰國餐廳就搵番泰國人做侍應，幾有風味既，態度都ok。之後嗌左飲品，叫左杯椰汁冰，size ok大杯，但個人認為稍微過甜。到食物，叫左幾款串燒，唔太熱，牛就un左小小，雞就幾好，有款叫泰式腸，入面有糯米，酸酸的，我唔知呢款腸本身係咁既味定點，個人就比較不喜歡。另外叫左一個蝦醬炒飯同青咖哩牛肉炒飯，四十幾蚊碟，炒得幾好食，出面同款飯我諗大約都要七八十蚊一碟，所以係抵既。之後到鐵板泰式炒蠔，d蠔冇腥味，蛋同芽菜就吸收哂蠔既味，雖然外觀就麻麻，但味道不錯，值得推介。最後到明爐魚，都幾滑，4個人都夠食。仲有蒜蓉炒通菜給冬蔭公。總括而言，4個人每人平均都係80蚊，咁既價錢的話，都算ok既。