A8's Cafe (已結業)

大埔一向出名多嘢食，Lunch經過一間新開張嘅地舖西餐廳，門面好開陽，佢嘅餐牌食物都幾適合我哋，所以入咗去試吓。餐牌上嘅食物圖片色彩繽紛，好吸引我哋，隨即就叫咗幾款食物。當然叫我最鍾意嘅英式早餐A，主要目的我都係想食炒蛋同埋炸薯餅，薯餅炸得好香脆可口，炒蛋好有牛奶味道，口感好滑。小食方面，叫咗煙肉芝焗薯係餐廳嘅推介食物，有我手掌咁大嘅薯仔用錫紙包住，面頭有芝士醬同埋煙肉粒，食落去薯仔軟綿綿，好香口。主菜方面叫咗香草澳洲羊鞍同埋蒜蓉扒大蝦🍤，羊假有三枝，食落去一啲都唔騷，而且有好濃郁嘅香草味道，肉質鮮嫩，必食。最後就係叫咗個蒜蓉比目魚配檸檬牛油汁，比目魚好香滑。餐飲方面叫咗熱華田，華田味道濃郁，好有奶味。最後埋單都只係四百幾蚊左右，兩個人食咗咁多野，實在太豐富了，大家都非常滿足。