富臨漁港 (已結業)

屋企人黎開APM行街順便約我收工一齊食埋晚飯，咁急一下子諗唔起附近中菜有咩好選擇。落車行經觀塘廣場見富臨漁港做緊幾個小菜推廣優惠，於是就提議去試下！　經理推介我地熱賣既蠔皇八頭鲍魚扣金錢，見鄰台食客既實物都唔錯，咁我地4人各點一份過下鮑魚口癮。沾上濃稠蠔油汁炆煮好既鮑魚，色澤金黄滑身，肉質不單止爽口彈牙，兼配大大隻厚肉花菇，將鮑汁徹底吸收晒超入味！食完鮑魚就點左個熱騰騰既鐵板雙葱爆手切鮮牛肉，上檯時盪手冒煙既鐵板仲發出幾下吱吱聲。京葱、洋蔥落鑊爆香左後經已迅即喚醒你既味蕾，再加上熱力把牛肉內在既油香釋放出黎，肉質入口嫩滑，味濃而不乾涸。最後自私D想食下香辣風味既青菜，於是叫左一碟泰皇蝦球炒通菜。蝦肉上碟size大小勻一，咬落爽口唔會霉。通菜本身就用上香料辣椒炒香，雖然不及泰式餐廳果種辣既，但勝在微辣之餘又幾開胃，連平日唔太接受得辣既屋企人都話好味食清光。