牛脾氣

營業中

休息中

今日同老公踩單車去大埔，見到呢間舖頭名叫牛脾氣，個名好得意，似足牛脾氣嘅老公，所以就揀左呢間食晚飯。餐廳唔大唔細，燈光光猛，好乾淨，空間寬闊，坐得好舒服。呢度種類都唔少，全日套餐有牛類、豬類同海產類，另外有好多小食揀同埋爐端石板燒，價錢一d都唔貴。老公發辦點左個小食，兩個全日套餐。小食係芝麻雞翼，雞翼剛炸起，熱辣辣，入口香脆，芝麻味仲好香，好好食。先黎個黑椒牛舌飯，呢個全日套餐仲跟埋沙律同高罐汽水。沙律菜洗得乾，爽口，醬汁係日式醬汁，食落去酸酸地幾開胃。牛舌唔太韌，味濃，有黑椒味但唔辣，珍珠米軟硬適中，帶少少牛肉汁，老公話呢個餐都唔錯。我就叫左個吉烈芝士豬扒飯配明太子沙律醬全日餐，豬扒夠厚身，咬落去有吉烈果種輕脆感覺，入口有好香芝士味但唔漏，仲有明太子沙律醬上面嘅粒粒蟹子，整體好有口感。下面仲有一隻半生熟雞蛋，煎得幾好喎，好香。