香港餐室 (已結業)

今日經過見到呢間小店，有種似曾相識嘅感覺，再望望門外餐牌，原來就係之前成日喺深水埗幫襯嘅小店，而家搬左黎佐敦，仲方便左。於是乎晚上就試左呢度嘅晚餐，入到店內，座位間格都適中，有唔少嘅卡位供選擇，而且店員姐姐都好細心，幫我揀選無甘大風嘅位置，以防我凍親，值得加分。打開餐牌，晚餐有好多選擇，有焗飯意粉喇沙同扒餐，價錢約4x~9x，非常經濟實惠，適合慳家嘅小情侶。今晚我地叫左2個扒餐，一份係魚柳併牛柳配天使面，另一份係牛肩扒配天使面，上枱時份量十足。有餐湯，墨西哥薄餅，又有沙律菜伴碟，男士都唔會餓親。特別要讚賞下，牛肩扒牛味濃，而且廚師煎扒外脆內軟，保持到肉汁， 而且天使面唔係煮到爛晒，入口時仲有彈性。下次經過一定要試埋呢度嘅焗飯水準如何。