上海廳 (已結業)

去探朋友嘅好處就係令自己去到唔同嘅地方，可以發掘一下唔同嘅美食。今次我哋有去到天水圍天瑞村探朋友。商場食物選擇唔太多，因為我哋有小朋友嘅關係，見到呢一間上海聽幾寬闊，有選址呢度食飯。雖然係星期日，但可能已經九點太晏嘅關係，天水圍嘅居民已經歸家，餐廳位置好多。上海菜我最鍾意食雞絲粉皮， 呢度都整得唔錯，麻醬好香，只係略嫌粉皮唔夠彈牙。但食落去上海風味十足醉雞，好幸運地廚房俾咗近脾嘅位置我哋，唔太肥，而且肉好嫩滑！酒味好香，同雞完全融合一齊。另外呢度嘅糖醋排骨原來係凍食，味道酸酸甜甜，排骨半肥瘦。小籠包皮薄而且好多汁。不過略嫌肉嘅鮮味唔太足夠。擔擔麵份量好多，我哋足夠分成四小碗！湯底香甜帶少少麻辣，不過如果多一啲麻醬風味就更加好。呢度小館型式經營，食物水準整體不錯，其實屋村商場其實都好多唔同選擇可以試吓！