阿來泰式地道風味 (已結業)

聽講阿來泰式地道風味嘅海南雞飯幾好食，早排試咗一次，果然唔錯。呢個海南雞已經去咗骨，方便食用，雞嘅份量算多，肉質唔嚡夠鹹味，配埋油飯，只賣五十蚊，性價比高。另外，泰式肉碎生菜包都好食，通常食親生菜包，食到最尾，都係冇哂生菜剩返啲肉碎😂，呢度嘅生菜就份量較多，肉碎調味亦夠，除咗鹹味同辣味，仲有我最鍾意嘅青檸味道。至於蒜蓉炒通菜飯同泰式炒粉絲就正常味道，唯一係個金柚子鮮蝦沙律認真麻麻，沙律太乾，柚子更有苦味。總括而言，呢度嘅食物味道較濃，重口味嘅人應該會鍾意。