華記士多 (已結業)

幾年都唔黎一次西灣河，難得出黎就梗係處理一下口袋名單，揀左華記士多。華記士多都算近太安樓，小店一間，有瓦遮頭嘅只有幾個位，其餘喺後巷開枱仔，有心理準備環境就一般，但比起我去過一啲有坑渠嘅後欄，比下有餘。週日下午茶時間坐滿人，搭枱係基本。姐姐們幾好笑容，由於已經食左野先黎，我地兩人分享一個飯，都冇任何不悅，用餐愉快。餐牌只有三款飯：芝士咖喱蛋包飯、咖喱蛋包飯、台式滷肉飯，定價$38/43，附送茶/啡/菜蜜，凍飲同價，去邊度搵。如果唔係後巷，一般茶記都收4、50蚊啦。9成9人都點咖喱飯，廚房不停製作，上菜速度快。咖喱蛋包飯 $38蛋包飯賣相讚，一啲都唔頹，滑蛋緊緊包裹飯粒，淋上滿滿咖喱汁，見到都流哂口水蛋奄列薄身、好滑溜，完全唔老，油就點都有架喇。揭開奄列，裡面有滿滿熱辣辣嘅豉油飯粒，好似有少少豬油咁；仲有雞肉，有誠意。配典型盒裝嗰種日式咖喱塊開成嘅汁，醬汁稀身，想像得到嘅，唔會好辣，少少甜，好好送飯，講真自己一個都輕鬆食得哂可能我食得多頹頹茶餐，真係唔會太harsh，我覺得值得一試，性價比高；當然如果對環境、後巷呢啲好反感嘅，就唔建議啦