民華餐廳

營業中

休息中

復活節假期間嘅星期六，晏晝有節目，去之前喺地鐵站附近茶記食個快lunch。呀爸呀媽成日提起星期日食民華常餐，但我同老公今次係第一次幫襯，原來好多野食揀。常餐竟然有九款粉麵揀！我要左鮮茄牛肉通、餐肉炒蛋多士，凍檸茶。茄湯係濃湯o個款，茄味十足唔會過酸，類似中環某出名排檔茶記，牛肉份量都幾多。炒蛋夠香滑唔多油，多士外脆內軟牛油搽得夠均勻，正。老公叫咖哩牛筋腩飯，牛筋同牛腩份量各佔一半，咖哩香濃微辣，類似馬來西亞咖哩，撈飯食一流，飯面嘅煎蛋流心架，賣相吸引。另外加左個西多士，呢度嘅西多士好特別，係將厚多士兩邊都沾上蛋漿然後炸香，金黃有光澤之餘有蛋味，每一啖都充滿住牛油同煉奶，邢惡得黎勁好味！另外仲見到唔少人食盅飯同點心，不過兩個人食三樣野好飽喇，下次有機會再試。埋單只係$131，性價比甚高。另外值得一讚係店員好有禮貌，食物上得好快。