水門泰式海南雞飯專門店 (已結業)

水門雞飯咁黃咁出名，我居然一直都未試過，唔少朋友覺得好奇怪，但當你知道我本身唔太鍾意食雞嘅時候，就會明白我嘅苦衷😅。早兩個禮拜去到西九龍 food court 黃店地帶，行咗兩個圈，左揀右揀，最後終於決定食雞。叫咗個海南雞飯，一睇啲雞就覺得好開心，因為係我最鍾意食嘅雞胸肉，仲有一隻翼尖。個飯雖然只係 35 蚊，但係用料一啲都冇將就，雞肉比想像中嫩滑有雞味，唔似一般雞胸肉咁嚡颯颯，點埋醬汁，酸酸辣辣，超級好食；油飯鹹鹹地，但係又唔會油淋淋，仲有淡淡雞香味，唔知係咪用雞湯煮嘅呢🤔？就算冇餸，齋食飯其實都好滋味😋。個湯都值得一讚，蟲草花無花果圓肉紅棗杞子沙參玉竹一應俱全，飲得出真材實料，既好味，感覺亦好健康😬。