影片
更多
2014-09-24
2337 瀏覽
八月中旬，契妹生日請食飯，新舊好友聚首一堂，大家不談政治，只談食經，樂也融融；全晚焦點可以話係當A友人推介新派分子料理「水月」，顯示出手機內多張照片，小肥同哥哥都深深被新穎悅目o既菜式有所迷倒，更留下深刻印象。數星期後，一眾表兄弟姊妹相約聚餐聯誼，正當大家為地點而苦惱之際，細佬覺得機會黎啦，就提議搞搞新意思，一嚐本地創作，睇吓「水月」點樣去分解及重組食材 。得到各人同意後，XO仔就第一時間打電話留位，卻因線路繁忙被轉駁到留言信箱，幸好留言訊息中明確地指出客人可以whatsapp訂座，結果全程不用真人對話，聯絡人隨即傳來訂座詳情，餐單、食物相片、餐廳名片及地址，雙方又有記錄，夠哂簡易方便。請留意，如果人數多，食客必先繳付五成訂金。位於銅鑼灣o既「水月」其實都幾隱蔽，冇人介紹自己真係未必會留意到，不過交通總算方便，離各種車站都唔算遠，坐地鐡就要行多少少路，而駕駛人士可選擇泊架車喺餐廳對面o既珀麗酒店（$60/鐘 ），又或者係較經濟但遠o既皇室堡停車場。「水月」門面一身落地玻璃，感覺樸素o既同時，亦特顯其頂部形似水中月蝕o既暗黃招牌，妙哉！餐廳室內燈光柔和，幾個角落擺放住流水燈飾及擺設，
數星期後，一眾表兄弟姊妹相約聚餐聯誼，正當大家為地點而苦惱之際，細佬覺得機會黎啦，就提議搞搞新意思，一嚐本地創作，睇吓「水月」點樣去分解及重組食材 。得到各人同意後，XO仔就第一時間打電話留位，卻因線路繁忙被轉駁到留言信箱，幸好留言訊息中明確地指出客人可以whatsapp訂座，結果全程不用真人對話，聯絡人隨即傳來訂座詳情，餐單、食物相片、餐廳名片及地址，雙方又有記錄，夠哂簡易方便。請留意，如果人數多，食客必先繳付五成訂金。
位於銅鑼灣o既「水月」其實都幾隱蔽，冇人介紹自己真係未必會留意到，不過交通總算方便，離各種車站都唔算遠，坐地鐡就要行多少少路，而駕駛人士可選擇泊架車喺餐廳對面o既珀麗酒店（$60/鐘 ），又或者係較經濟但遠o既皇室堡停車場。「水月」門面一身落地玻璃，感覺樸素o既同時，亦特顯其頂部形似水中月蝕o既暗黃招牌，妙哉！餐廳室內燈光柔和，幾個角落擺放住流水燈飾及擺設，好襯托「水月」個名，二十多個座位連同水吧，一眼望哂。餐桌全為方形木枱，可隨意拼成不同長短o既散枱，皮櫈寬闊，簡潔舒適衛生。
負責樓面工作只有「水月俠女」珊珊及史提芬，二人同樣溫婉有禮，客氣友善，換碟、加水、添酒等功夫全為自動波，服務分滿瀉。
食客入座不久，珊珊先問及客人選擇飲有氣定冇氣o既水（$38/樽），並解釋餐廳冇提供熱水服務，但因套餐包有咖啡或茶，食客可先點熱茶。我地當晚自攜一枝1.8L日本清酒（餐廳收取$200開瓶費），結果七個人都係飲咗兩樽水。
打開餐牌，原來當中有英文版及素菜編，好明顯「水月」都好歡迎外籍及素食賓客。
送上飲料後，珊珊就為大家講解晚市套餐中各款主菜o既特色、煮法等，以供食客參考及選擇，以下為小弟未有品嚐o既四味：低溫蒸三文魚配中式酸醋汁（Slow Cook Steamed Salmon Steak with Chinese Style Vinaigrette）：以低溫蒸o既三文魚質感較滑，溶於口中，配上醋汁所以唔會好溜。
珊珊推介之香煎新鮮北海道帶子配蜜糖豉油汁（Scallop with Honey Soy Sauce）+ $80：北海道帶子每日新鮮空運到港，外出賣價約每粒$200 ，「水月」用蜜糖汁烹調令帶子如絲般軟滑，係五款中珊珊最為欣賞o既。可惜，同行o既表兄弟姊妹們大多為食肉獸，未有人試嚐。美國頂級肉眼扒配蒜蓉泥（US Prime Rib Eye with Roasted Garlic）+ $168：牛扒美國入口，牛肉味出名香濃。
北海道黑毛豬前肩扒配八珍山渣汁（Japanese Hokkaido Pork Steak with Bazhen Hawthorn Sauce）+ $40：黑毛豬o既肩膊位較其他部位爽口，師傅建議八成熟，肉汁會更豐富，肉質亦唔會過實。
老闆娘Karen留守於廚房，為客人烹調美食，但得知我家表弟婦為孕婦時，就立刻通知表弟婦懷孕期間應避免進食山渣，並體貼地為佢所點選o既黑毛豬由山渣汁改為蜜糖汁 。準八時，幻彩水月宴正式上演，每個環節先由「水月俠女」作出詳盡o既介紹，而且時間控制得恰到好處，觀眾絕對有足夠o既時間細心欣賞及品嚐 。
鮮露荀蕃茄乾八爪魚（Octopus with Fresh Asparagus & Dried Tomatoes）：頭盤所用o既碟上印有一雙手，據珊珊所講，其實係意味著好友獻上食物，充滿熱誠及愛心，有意思得很 ！冷盤中o既八爪魚同鮮露荀都好爽脆，後者仲有一份清新感，伴碟o既蕃茄仔就好甜，加上微酸o既蕃茄汁有醒胃之效，幾得意。
黃金蝦（Shrimp with Salted Egg Yolk）：此乃中式分子料理之作，大廚先將原隻蝦連殼抽乾水份，慢慢烘成蝦片，再將咸蛋黃同調味粉炒炸成黃金及白雪粒，最後灑上櫻花蝦乾。個人覺得用手食最為簡單直接，薄薄o既蝦片味似咸魚，連黃金調味粒一齊食非常野味，但美中不足就係蝦片唔夠脆，感覺就好似淨係食咗層蝦殼後唔知個蝦身去咗邊到咁，有種莫名o既空虛感。
熱石燒鮑魚（Stone Grilled Abalone）：每位客人都有鮮鮑一隻、四百度熱石一塊、鉗一雙、海帶一殼。以日式石燒形式最能燒出鮑魚之鮮味，大廚建議每邊燒約八秒，因過熟質感會變得韌，食客自行燒煮可控制煙韌度o既同時，亦可以即燒即食，保持熱度十足。石燒鮑魚好爽滑，輕輕點上海帶入面o既薑醋汁更能帶出鮑魚o既鮮甜味，唔錯，不過細佬覺得淨食海帶味道真係過酸 ，雖然話有消滯之用，但如果可以輕手少少會好好多。
龍吐珠配墨魚汁醬（Deep Fried Shrimp Ball with Longan and Crab Roe）：此道餸乃新鮮蝦膠打製而成o既炸蝦丸，內層藏有龍眼肉，咬破龍眼肉就能吐出蟹子珠，故取名為「龍吐珠」。龍吐珠外層超級爽脆彈牙，中間粒龍眼肉就好清甜，中心o既蟹子又能保持鮮嫩，層次分明，點上墨魚沙律醬增添一份鮮香味，真係教人拍案叫絕 ！
黑松露天使麵（Black Truffle Angel Hair）+ $158：大廚深信黑松露天使麵應凍食為最佳，因熱量會將黑松露溶解，容易流失主材及其味道。幼條o既天使麵一切就斷，柔軟嫩脆，雖然醬汁不多，光滑得黎一啲都唔油膩，黑松露清香撲鼻，以伴碟o既魚子醬加以點綴，整體清新香濃，簡單美味！
意大利西西里紅蝦意粉（Sicilian Red Prawn Pasta）+ $188：醬汁用西西里紅蝦餚製，每條意粉都能嚐出紅蝦o既味道，表姐夫讚嘆地形容此乃全晚最感人之菜式 ！哥哥亦大讚意粉果真濃郁入味，好夠al dente。
宮廷黑虎掌湯（Sarcodon Aspratus Mushroom Soup）：黑虎掌屬菌類，中國歷史中亦有記載為珍貴貢品之一，因其黑色o既外表形如虎掌而得其名。師傅以中材西煮烹調出黑虎掌湯，味道淡而苦澀 ，好似飲緊用藥材煲出黎o既蘑菇湯咁，加咗鹽同胡椒粉雖然易入口啲，不過唔係個個人都接受得到。
青檸泡泡（Lime Bubble）：青檸泡泡只有一口，酸酸甜甜，望入樽度睇唔到 ，因為已藏於飲管內，珊珊話份量剛好足以清洗一吓腸胃。表弟真係醒目，飲完嗰啖泡泡再用飲管飲水，順便清洗埋枝飲管 。
主菜之麻籽烤威爾斯羊架（Roasted Wales Lamb Rack with Hempseed）：「水月」所選用o既羊仔原來係未戒奶 ，所以一啲蘇味都冇，四成熟呈粉紅色o既肉質軟嫩，正於珊珊介紹時所講，用麻籽醃過o既外層係麻多過辣，配上白色薄荷粉末感覺四川得黎又好西方，巧妙地刺激味蕾，非常精彩 ！如果食客嫌唔夠辣唔緊要，因為碟上橙色o既汁液其實係經高溫處理過o既辣油，香滑野味。
芒果熱情果Panna Cotta，椰子泡配雲尼拿雪糕糖波（Mango Passion Fruit Panna Cotta, Coconut Foam with Gelato Light Bulb）：甜品只有一款，外形不但美觀，亦係最能打動小肥o既一道。黃色圓形o既係芒果熱情果Panna Cotta，酸甜幼滑，醒胃消滯。白色泡狀為椰子泡泡，椰味清新且唔溜。火紅色o既糖波英文名字譯作為「燈泡」，非常貼切，因其外皮質感同燈泡o既外殼相似，薄脆無比，一敲即碎，內藏雪糕燈膽，集香甜脆滑於一身，撈入嚡嚡o既朱古力泥及潤滑o既椰子泡沫，美味指數當然係爆哂燈啦 ！
咖啡（Coffee）：咖啡只有一款，可能因為自己飲關espresso，所以覺得味道唔夠濃郁。如果「水月」可以加多個espresso作選擇就最理想。
餐牌第一頁註明「水月」取名於「水中月」，猶如月亮於水中之倒影會隨着水o既不同狀況創造出不同形態，食材亦可同樣地因應不同o既烹飪技巧而製造出變幻莫測o既效果！「水月」o既烹調概念清晰，菜式獨特嶄新，食客可嚐盡大廚o既心思及廚藝，招呼周到，晚餐約六百至七百蚊一位，雖不算超值，但價錢絕對合理。嘻嘻，XO仔已經約好咗班牌友稍後再戰「水月」 ，老闆娘更特別為幾位長輩調整餐單，萬分感激！
張貼
