上海佬蟹莊 (已結業)

琴日同同事慶生，揀咗杜老誌道果間上海佬，同事話lunch時唔算太多人，坐得舒服。去到發現佢地推緊個$80 lunch，有前菜同飯麵飲品，都幾抵，所以叫咗幾個set再加單點。最驚喜係個「九小碟」，出嚟果時以為係日本菜，好精緻。九小碟包括馬蘭頭、炸豆腐、海蜇頭、四喜烤麩、素鵝、拍青瓜、黑木耳、鎮江肴肉同麻辣豬耳。我覺得最出色係個豬耳，唔算辣，好惹味好有煙煙韌韌口感，食成碟都唔覺好膩；海蜇頭都唔錯，爽脆同有好香麻油味；四喜烤麩果啲麵筋好入味，酸酸甜甜，但又唔會浸到林晒，有咬口，直得一讚！另外叫咗太極小籠包，一開原來係黑松露小籠包同灌湯小籠包，小籠包皮薄，而且有淡淡地黑松露味，唔會搶左肉味。不過夾果時真係要小心，由於佢都幾多湯，大力夾個皮好會穿，要溫柔咁夾先得呀！！而排骨菜飯、蔥爆牛肉飯味道都好好味，個菜飯好熱又超大碗，我哋幾個女仔share都夠，食到好飽！！