雅廊咖啡室 (裝修中)

今晚我們一家四口慶祝哥哥嘅生日，所以我們去咗之前食過覺得幾好嘅尖沙咀富豪九龍酒店嘅「雅廊咖啡室」食自助晚餐！他們今期嘅主題係海鮮，當中我們最鍾意嘅凍龍蝦，今期新推出嘅係美國緬因州凍龍蝦嘅肉質極之爽滑彈牙，味道非常鮮甜，比以前食開嘅加拿大凍龍蝦更加爽甜！另一款我們最鍾意嘅西班牙海鮮炒飯之前嘅賣相已經好精緻吸引，但今次嘅擺設賣相更加色彩繽紛同舖砌得非常整齊，海鮮嘅份量多到差唔多遮蓋晒啲炒飯，炒飯炒得好乾身，而且唔會好油膩嘅感覺！蒜蓉粉絲蒸大元貝嘅肉質相當鮮嫩彈牙，蒜蓉嘅份量唔係太多，唔會掩蓋咗元貝本身嘅鮮甜味！至於甜品方面，有啲新款式，當中我們食咗幾款之後覺得雙重朱古力慕絲蛋糕係最好味嘅，外層係超級濃郁嘅朱古力漿同朱古力碎片，入面係有兩層慕絲蛋糕，上層係朱古力味，下層係吉士味，質感極之軟滑，味道超香甜！另外！本人訂位嗰陣話哥哥生日，餐廳話會有個蛋糕送，同埋有即場有師傅畫寫名字同圖案，所以本人就寫咗大約嘅概念同意思畀師傅參考，去到差唔多食到最尾嗰陣，店員就攞個蛋糕出嚟，哥哥見到之後覺得超級開心同驚喜萬分！值得一讚嘅係師傅嘅手工，真係畫得好精緻同好有心思！