南豐餐廳

營業中

休息中

路過食個Tea～～第一次惠顧此茶餐廳，進店之後自己選擇座位，店員見我企喺其中一張卡位隔離，立即過來幫忙清理之前食客的碗碟，讓我坐下。然後問我是否食下午茶，幫我打開餐牌下午茶果版。下午茶都好多選擇，樣樣都想試，原本想叫招牌菠蘿包，店員話有火腿蛋响菠蘿包入面，不過菠蘿包啱啱賣晒，唯有轉食炸豬扒沙律，友人就食炸雞脾沙律。雞髀同埋豬扒都頗大件，但係有點炸過龍，現場睇的話顏色比較深，影相就唔覺。豬扒炸得比較乾，雞髀我就冇試到。配嘅沙律有少少誠意，雖然都係罐頭水果，起碼冇薯仔，唔會話用好多薯仔沖撐場面，降低成本，而且沙律裏面有椰纖果，配埋炸嘢嚟食，感覺冇咁熱氣，不過都有一般茶餐廳嘅問題，就係太多沙律醬。我飲嘅係熱鴛鴦少奶，冇咩特別，飲完都冇咩印象。正正常常咁囉。雖然我去嘅時候只係四點幾五點，但見到好多街坊喺度食小菜，我打開餐牌睇吓，發覺佢啲小菜好多選擇，同埋幾抵食咁，走嘅時候行過，仲見到啲小菜幾大碟下，打算有機會再去試吓佢啲小菜。