Three Dice Kitchen (已結業)

同朋友行灣仔openrice到呢間餐廳，每一道菜都前所未見，決定一試。餐廳同地鐵站有啲距離，需要行好多段天橋一條駁一條先到達。開放式嘅設計好通風，藤蔓檯凳有種田園清新嘅感覺。藍蝶系列特飲非常吸引，我同朋友叫左藍蝶柚子蜜同星空特飲。星空特飲註明會變色，原來係將檸檬汁加入飲品當中，就會由深藍色邊為棗紅色，好神奇！味道酸澀開胃，值得一試。龍蒿芥末芝士伴低溫慢煮三文魚-果然低溫慢煮嘅三文魚肉滑多汁，外皮煎得香脆，入面嘅三文魚香味同海水嘅鹹味保留得最完整。加上切碎嘅龍蒿，魚味更加香濃提升。薯蓉打得軟綿，香滑鬆軟嘅質感加上濃香嘅三文魚肉簡直一絕。特別好奇嘅係多次係網上見到日式嘅透明果凍，而呢度有三種口味可供選擇。玫瑰果園味真係正！玫瑰草莓糖醬甜而不膩，加上原本無味但口感爽滑嘅果凍融合得天衣無縫，加上旁邊香脆嘅分子凍乾紅桑子粒，咬開爆出一絲紅桑子酸味，非常有新意。