悠蔬食 (渣甸中心) (已結業)

啱啱過完農曆年，初七第一日開工吉日。夜晚約咗女朋友食飯，同佢一致認為要食下齋，食下素食養生同配合下節日。喺銅鑼灣搵到呢間都幾出名嘅素食餐廳。冇book位以為冇乜人，就咁走上去walk-in，所以等左一陣先有得食，但係都算快10分鐘左右。入到去個裝修都幾好，睇落舒舒服服！入到去餐廳職員即刻同我地介紹餐廳招牌菜及套餐，服務態度幾好👍🏻 睇得出係有心機照顧客人！ 因為本身今日胃口麻麻地，可能係因為要開工😂我哋最後冇點到套餐，只係散叫。對於我呢啲食肉獸而言，本來冇乜咩期望，諗住陪女朋友應吓節就算。點知原來呢間素食餐廳有別於其他齋鋪。唔係嗰啲整啲素叉燒素魚肉加素牛肉啲鋪頭。係我哋嘅角度，呢啲先係真正嘅素食餐廳！ 我地點左三個餸，分別係鹹香茄子猴頭菇豆腐煲，百合杞子豆乳浸溫室皇帝苗，同雜錦香樁炒飯。 第一個出嘅係百合杞子皇帝苗，我女朋友勁鍾意食覺得好健康，我識落就真係覺得係冇味精，同埋夠新鮮，可能同女朋友成日打邊爐嘅關係，我哋習慣性飲埋呢個餸啲湯。哈哈第二個茄子猴頭菇豆腐煲夠入味，不過不失。但係佢個炒飯就值得一讚，每粒飯都分明同埋冇油係底。師傅應該功夫夠深。大家鍾意食齋嘅朋友不妨一試呢間素菜餐廳。