616燒肉酒場 (已結業)

呢間位於大圍嘅燒肉店，精明嘅你一定會揀午市黎食，因為相對經濟又實惠。入到舖頭，好有置身於日本嘅感覺，餐廳環境十分好亦都相當闊落，牆身有畫，天花吊有吊燈同櫻花，可以見到餐廳佈置方面有落足心機。午市燒肉套餐已經包左沙律，茶碗蒸，白飯同甜品，當日我哋揀咗澳洲和牛套餐同雜錦烤肉套餐，澳洲黃牛套餐全部都好有油花味，牛舌更加係相當厚肉，而且餐廳嘅燒肉汁唔咸之餘仲好惹味！開頭以為雜錦烤肉比較普通，但餐廳配上嘅豬腩肉又係厚身淋口，雞肉的香草味都顯得有特色！茶碗蒸既蛋好滑，而且加咗百合，味道更清甜，茶碗蒸上面都毫不吝嗇加上蟹肉！讚！當日食嘅甜品係綠茶厥餅，雖然細細份，但口感煙韌內層涼浸浸之餘，綠茶粉嘅回甘配上適當既黑蜜亦都係好好既配搭！另外，欣賞服務員主動為我地添加熱茶！餐廳門口亦都放有信封，供顧客放口罩！總括而言，係食得相當愉快嘅一餐！用OpenRice訂位更加有單點餐牌九折優惠添！