hoo韓國包車

營業中

休息中

一向都鍾意食韓式炸雞，呢間餐廳唔單止啲食物好食，餐廳既裝修都好有特色，好有韓國feel 同帶點懷舊感覺，有幾個特別既打卡場景，食好嘢之餘仲可以影好多靚相，好正!講番食物先，食韓國嘢一定有既前菜小碟，泡菜同芽菜味道都好好，其實一食前菜都已經知道餐廳既質素。部隊鍋平時就食得多，今日就叫左一道比較特別既菜式，係其他韓國餐廳都未必會有既街頭魚糕串串鍋，韓國魚糕味道有啲似港式魚蛋，形狀就係薄薄一塊長形或圓形，口感有點煙韌，係韓國既一種街頭小食。呢度就用一個鍋熱住，到湯滾起就可以點特製醬油食，魚糕魚肉味濃厚，食吓食吓，喺韓國街頭買小食既情景不禁湧出黎。不得不提湯裡面既白蘿蔔，煮到入哂味非常好味!另外必點既一定係炸雞，揀左最喜歡既甜辣口味，甜中帶少少辣，又開胃又惹味，而且呢度既炸雞外面脆，裡面肉質比以往食過既滑，醃蘿蔔都好好味，真係食到停唔到口。