金船長餐廳 (已結業)

尋晚同老公仔終於有時間去試金船長餐廳，本來去到見到唔係太大，都驚會中伏，不過整體真係幾好，價錢比預想中平。我地點左個6寸得獎黑松露pizza，一個黑松露意大利飯，&一個車仔意粉(要左卡邦尼汁+扁意粉+蒜茸+其中一款芝士+香草雞絲)，另外加左$28轉餐，要左粟米忌廉湯&凍奶茶。湯同蒜蓉包就一般，兩樣都係偏淡，粟米忌廉湯個味幾得意，有小小燕麥味道。另外，奶茶就幾好，奶同茶味平均。跟住就黎左黑松露pizza，一黎到店員好細心，問我地有無食過，之後就教左我地3種食法，我同老公仔都認為乜都唔加嘅食法就最正，又變成左我嘅最愛食品之一<3。之後就到黑松露飯，一開始就覺得超好味，但之後就略嫌有點偏醎。最後就到車仔意粉，呢個就一般，好濃味，好creamy，但就真係太膩，同埋感覺上可能係我地點左嘅香草雞絲同卡邦尼汁唔太match。埋單$362，比我地預想中平，因為真係食得好飽好飽，黑松露pizza又真係超好食，其他野食雖然還有進步空間，但加埋侍應服務態度，係值嘅，當中跟單侍應安排上食物嘅程序好細心。