榆越 (已結業)

今日去咗天水圍賀一賀個朋友新居入伙，喺佢屋企玩完之後，佢就帶咗我哋去呢間越南餐廳到試試，佢話呢間餐廳好性價比高，唔係好起眼，但食物質素好得，服務都好好👍🏻招牌燒牛肉越式法包🌯越式法包係我近期比較鍾意食嘅食物，法包烤至香脆，咬落去卜卜聲而且軟硬適中，燒牛肉嘅份量好多，加上蔬菜同醬汁，食落唔會太油膩，反而令人好開胃～去骨手撕雞撈檬🐥+串燒豬頸肉🐷成碗都鋪滿晒雞肉，估唔到雞絲嘅份量會同檬粉一樣多，加埋青瓜生菜花生同醬汁，酸酸甜甜，感覺清新，完全係夏天消暑嘅涼物，另外加咗串燒豬頸肉，肉質彈牙，微微嘅焦香好惹味～蒜蓉牛油雞翼（推介💕）好耐都冇食過一間好味嘅牛油雞翼，今次竟然俾我搵到，首先即叫即炸，已經加唔少分，咬落去蒜蓉同牛油味都勁濃勁重勁香，炸到外脆內軟，但係唔會感覺太油膩，食完有一種幸福嘅開心感🤤金絲網春卷好鍾意越式嘅春卷係用蜂巢皮去製造，咬落會特別鬆脆，入面嘅餡料好豐富，點埋醬汁就更加好味😋芒果沙冰&椰子沙冰🍧跟餐可以加錢試埋兩杯沙冰，飲落勁透心涼，完全係消暑嘅恩物，解熱又解渴～榆越 (天水圍)天水圍天秀路8號天一商城1樓1027號舖評分：8/10