牛大人台灣火鍋吃到飽 (大鴻輝(荃灣)中心)

營業中

休息中

天氣轉涼，所以想去打邊爐，於是又去咗食牛大人。 今次試咗新推出嘅$488日本黑毛和牛A4+吃到飽套餐，價錢雖然貴啲，但牛嘅質素真係非常高，啲雪花分佈得好靚好平均，牛味非常香濃，亦比平時食嘅澳洲牛同美國牛淋好多，食完絕對會覺得下次要再嚟食。 呢個套餐送咗每人兩粒澳洲M9和牛牛丸同埋海鮮拼盤，海鮮有生蠔、扇貝、鮑魚、蟶子。雖然海鮮唔係任食，但呢個餐有得任食4款唔同煮法嘅鮑魚，特別推介炭燒鹽蔥鮑魚，燒到個外皮幾香脆。呢個餐仲有得任食伊比利亞黑毛豬梅肉，平時打邊爐好少叫豬，但呢個都幾值得點黎食。 雪糕方面，今期有Movenpick雪糕，Oreo雪糕雪條同KitKat雪條任食，我食咗款粉紅色嘅KitKat雪條，幾特別，有啲似食朱古力咁。 另外，餐廳仲送咗一杯少爺生啤，呢杯啤酒好好飲！麥味好香，唔太苦，幾易入口，好少飲到咁正嘅啤酒！ 12月同1月食呢個餐仲送一個KitKat sweet planner set，當萬年曆用又得，當鐵盒裝嘢都得。 荃灣店相對之前食開嘅旺角店少人，所以即使夠鐘，餐廳都唔會即刻趕你走，所以同朋友聚會，嚟荃灣分店打邊爐都幾適合。