十二少海鮮刺身牛肉火鍋專門店 (已結業)

由於住係附近，成日都見好多人排隊，我同另一半都好鍾意食牛同刺身，所以就趁開學無耐出嚟抖下氣。地點方便就腳，大圍站行去5分鐘左右。由於熱熱地唔多開胃就簡左蕃茄湯底，黎到一睇就知足料，香噴噴，飲一啖湯就知貨真價實，好鮮甜。呢到最出名係刺身同牛肉，所以我地叫左三文魚，希靈魚同翡翠螺，果然產地直送，新鮮肥美。打邊爐邊面我地樣樣都想試，唔覺唔覺叫左好多，好滿足。牛頸脊帶有少少脂肪，有肉味得黎唔會韌，金錢展好有牛味，爽口彈牙，牛胸爽好特別，好似脂肪但係食落係爽口，好味。豬腩肉爽滑不肥膩。雞件好滑。打邊爐點可以唔叫海鮮，聖子細細隻但非常肥美，鮑魚洗得非常乾淨，入口爽口，蝦黎到啲腳仲郁郁吓，非常新鮮，肉蟹非常多羔，食落好鮮味，刀貝帶子都好鮮甜。我哋仲試埋佢嘅四色手打丸，彈牙爽口，一試就知用料十足。最後一定要試埋佢嘅手工餃，鮮蝦雲吞味道好大隻，入邊係隻大大蝦，麻辣餃子同芫荽餃子好惹味。我地叫左2杯飲品，見凍檸茶同咸檸7有個手指公就試呢2杯。2杯黎講大大杯，我覺得透心涼既咸檸7咸咸地中和番個甜味，好味d，打邊爐一流。價錢合理，一定有下次。