新福記 (已搬遷) 新店位置

前幾日同老公食生日飯，記起之前有幾個名咀推介過一間唔係好有名既食肆，必試佛跳牆及幾樣特色菜，就趁老公生日豪一次試吓啦！佛跳牆要最少早一日電話預訂，但就唔駛落訂。一去到先黎個小食: 九轉小腸試吓。我本人平時就唔食內臟，腸之類，怕有陣味。但老公話這味小腸唔肥，又無臭味，就畀面試一粒，果然又真係幾好味，又無我怕的內臟腸臭味，唔錯！跟住就梗係慢慢食咗個佛跳牆先叫其他餸。一打開個燉盅就已經好香，湯頭勁正，非常足料: 吉品鮑魚、關西遼參、花膠、花菇、魚翅、瑤柱、鵪鶉蛋等 ！邊飲邊食感覺個咀被黏住，塊花膠及糖心鮑簡直超黏，超好味！嘆完佛跳牆都飽咗一半，試多兩個菜: 福州荔枝肉、豬油渣炒菜花。而家這個天氣非荔枝季節，所以改用龍眼，加埋咕嚕肉個汁，酸酸甜甜幾開胃。豬油渣炒菜花比一般炒菜較香，食落亦唔覺得油漏漏，而且個菜花幾特別，一般酒樓都無食過，值得一試！最後試埋個花生湯湯圓，花生湯幾香，但湯圓就一般。其他糖水都要預訂，所以想試多一款都無 佛跳牆足料唔貴，值得一試！