鼎皇臭臭鍋 (已結業)

自從喺香港食過第一間台式嘅臭臭鍋之後而家每逢見到台灣嘅鍋物，我都好有興趣試，尤其是中午的話一個人入去食一個鍋加一杯珍珠奶茶就已經十分之滿足。呢度嘅鍋款式嘅選擇都非常之多 有成十幾種當然唔少得嘅就係台灣嘅臭臭鍋啦，但係今日我就冇食到，我反而注重係佢呢一度除咗有普通嘅鍋物之外仲會有養生鍋做主打。今日揀咗佢個麻油雞鍋，首先我就飲咗佢一啖湯，果然有非常之濃嘅麻油香，佢係用咗黑芝麻油。但係飲落去唔會覺得好油膩，反而有種好滋補養生嘅濃湯，再配黑芝麻油嘅感覺。比起平時火鍋嘅油膩簡直係天淵之別。我入邊有豬血糕，有麻油雞，蜆肉丸同埋豆腐等等。我比較想推介一下嘅就係佢嘅米線，台灣米線我初頭以為係我哋香港不嬲食開嘅米線，原來佢嘅米線係指圖上面嗰隻米黃色嘅豆皮。吃落去好有豆香，有嚼口。仲有重點推介就係呢一個鹹魚飯，通常台灣就剩係得滷肉飯，但係呢度如果你跟餐加＄12可以加個鹹魚飯。攞出黎已經聞到非常之香，但係食落去唔會有咸嘅感覺，好香好好食。