巴辣仔烤魚

營業中

休息中

見到網上好多人都推介呢間烤魚店，全港有九間分店，今日我就去咗西環嘅分店，夠辣夠惹味，極力推薦要去試吓！我哋嗌咗個沙巴龍躉烤魚（$378）配經典香辣湯底，再加配咗肥牛（$90）同埋娃娃菜（$20）。雖然湯底揀咗大辣，但我覺得個辣度可接受，平時食得辣嘅直接挑戰大辣都冇問題，面頭嘅辣椒同埋配料都好正，湯底越煮越辣，非常惹味，淨係聞到浸辣香就已經流晒口水！沙巴龍躉非常之嫩滑，好入味，辣得嚟唔會冇咗魚嘅新鮮味，而且好大條，好滿足！肥牛都係大大片，比平時食開嘅肥牛厚，肥瘦適中，口感嫩滑，幾好食！食烤魚又點少得菜，娃娃菜索晒湯底嘅香辣，但係一啲都唔油。另外我哋仲嗌咗羊肉串燒，羊肉一啲都唔羶，雖然都係揀咗大辣，但辣度還好，肉質幾軟熟，香料調味啱啱好。豬手整得幾腍，40幾蚊值得試吓。大推呢度嘅口水雞，辣得嚟雞肉幾嫩滑，份量都唔細，有驚喜，一定要試！最值得一提嘅係呢度有自助任飲菊花茶同埋任食冰粉，食完啲咁重口味嘅嘢食就夾晒啦！