快靚正燒味粉麵茶餐廳 (已結業)

呀媽話今晚有親戚上黎食飯，俾左幾百蚊我去斬料加送。就落左街去平時食開果間茶餐廳斬幾味啦！舖頭一邊主要係堂食既粥麵茶餐廳，另一邊係燒味粉麵同外賣斬料。燒味有好多款選擇，因為樣樣都想食，所以就每樣斬啲。燒鵝脹卜卜，好肥美，叉燒紅當當，有肥有瘦。有切雞有油雞，大大只。先先斬左叉燒同燒排骨各半斤。個磅向住客人，幾重幾錢一目了然！蜜汁沾滿每一寸，甜甜地。燒骨同叉燒啲肉都好林，肥瘦適中，食落個邊有少少焦焦地，好味！乳豬 一斤平時多數去飲先會食到乳豬，難得可以斬料，就二話不說要乳豬啦！斬果時已經聽到chock chock聲，好脆！職員提我地返到屋要打開個蓋，以免林左。只乳豬都幾好肉，擺到食飯時啲皮都仲係好脆口！點埋個甜醬食一流！乳豬真係燒味既一哥！燒鵝 下庄夠晒肥美！肉質食落去較實淨，個皮好薄，可以同肥肉分開，好香燒鵝既味道！油雞 半只油雞肥美，半只都好多下，雞肉好嫩滑，爽口。個人中意食油雞多過切雞，因為較惹味，個雞皮充滿住醬油既味道！平時都係係度食粉麵多，今日食埋佢個斬料，都唔錯！呀媽都好滿意！斬料個老細都好好講，會介紹下食咩好，下次唔知買咩送時可以落黎斬幾味！